قنــــاديل الشعـــــر((لايفوتكم))

السلام عليكم ورحمة الله..
قنـــــــاديـــــــل الشعــــر
يمكن كثير منكم مر عليه هالاسم
انا اخترت هذ العنوان وو عنــــوان لديوان يضم نخبه من الشعــــراء المبدعين
وهذ الديووان يعجبني فقلت انزلكم القصائد اللي موجوده في الديوان الرائع
قصـائد جدا رائعــــه كرووعه شعارها ومبدعينها وتحمل كم فضيع من الاحســاس
وهذ المووضوع من جهدي الخاص ابي تفاعلكم وردوودكم
لانكم تستاهلوون من يتعب لاجلكم..
وانا اخترت لكم عشووائي لاكن حلوووه ع ذووقي>>>>ثقه
ولو بيدي انزل الديوان كله لانه ابداع شعري فضيــع

بسم الله نبــــــدأ

غــــــريب الـدار
****************
غريب الدار ومناي التسلي
اسلي خاطري عن حب خلي
سمعت الشور من قاصر معرفه
يحـب البعـــد عن داره يسلي
اسافر عنه من ديره لديــــره
عســـــــاي اسلاه لكن ماحصلـي
واهوجس فيه وانســـي اني نسيته
وافكر في ليال قد مضلي
انا لاجيت ابا انساه لثــــــواني
خياله وانهمر دمعي يهـــــلي
دعـــاني ياغريبــــــ الدار عود
ترى مالك محل الامحلــــي
مكانك في عيوني ياعيوني
وصدري من عناقك مايملي
((الاميـــر خـــالد الفيصل))/دايم السيـــف


مكـــــانك..مكانك
***************
اموت من فرقاك واموت بلقاك
واموت من جورك وامووت بحنانك
كل قضــاه يموت مره...ويفداكـــــــ
وانا اموت الفين مره عشانك
اذكرك لامني نسيت اني انســــاك
وانساك لامني ذكرت انسيانك
رضيت انا بالهم لرضاك مرضاك
وارخصت لك قلب جرحته وصانكـــ
اجيك في صدري عتاب ..وبجفـــاك
وارجع الوم الوقت واقول خانك
احب فيك احساسي اني بلاماك
في عز خوفي منك احس بأمانك
عجزت افرق بين وصلك وفرقاك
ياللي عطيت الناس بيدك عنانك
مرتجيني لين اقول اني اياك
ومرا تروح بعيد وانسى اوانك
اقبل وتقفي..واعتذر عن خطايك
واقول ماعييت عيا زمـــــــــانكــ
وان خانتك دنياك واو خنت دنياك
ارجع وتلقابي مكانك مكانك
((طلال العبد العزيز الرشيــد))/الملتـــاع

ســــافري
**************
سافري كان يرضيــــك السفر
جربي لورى ليلي صبــــاح
بدلي الرمل بأصــداف البحـــر
واتبعي الغيم تحميك الرياح
سافري لين تبكين المطر
واضحكي لين ماتضيق البراح
لاتعبتي .......وحسيت بضجر
خلي الشوق لديارك جناح
ارجعي في ابتسامات السفــر
مثل مالدمع في عيني سماح
انتي العين..من طول النظر
وانتي القلب من كثر الجراح

((الامير بدر بن عبد المحسن))


الله بما تبي يرميـــــــك
*****************
يقول لي شيخ شرى قلبه وباع
كم واحد غدى جرحه ضحكة ايديك
واقول عزالي ترى الشعر خداع
ياليت واطيني من الغبن واطيك
وقتي وكايل لي من الضيم بالصاع
حزني ولا شابه الشعر تشكيك
تضربنـــي الدنيا وانا اقول لساع
قدامي ايامي ولابد ماقضيك
اقضيك ياصبر جزى عمره وماع
موع الشموع اللي مسا العيد تبكيك
تبكيك ياعهد نهض جرحه وفاع
غدت به الهقوه ولانيته فيك
ياسيدي ياللي من الصد ملتاع
على اللي برووحي من الهم يخطيك
ياليت لي قلب واذ سيم ينباع
وابيع لك وعد وطا الروح واشريك
غرك قصيد اللي هوى جرحها شاع
حتى حسيت اني قبل اعرفك انويك
عز الله ان كانك بالاوهام طماع
ماقول غير الله بما تبي يرميك
((ريميـــــــه))

طولهن واحد ولبستهن وممشاهن
***************************
صادفني ثلاث احترت وياهن
ابهرني صحيح وقمت اطالعهن
طولهن واحد ولبتهن وممشاهن
والله اعلم بعد يمكن طبايعهن
زاهيات براقعهن وتزهاهن
لعنبو جدهن مااحلى براقعهن
لارضى ابوهن وعن الناس خباهن
ولابغى يدمر العالم ويطلعهن
قمت اعدد ع نفسي مزاياهن
وقمت اردد ع نفسي وانا اتبعهن
هذي احلاهن لا لا لا هذي احلاهن
لا لا لاذيك لا لاماهي بمعهن
واستدارن بجنبي شخصن ناداهن
قلت ذي فرصتي باقصد وسمعهن
والقصايد معني حافظ ارداهن
ارتبكت وعجزت اتذكر اروعهن
والسوالف بعد خلني انساهن
ضيعني صحيح الله يضيعهن
والدليل اني تخربطت وياهن
ابسلم عليهن قمت اودعهن
((خالد المريخي))


وشلوونك
خساره الحب ماتستاهل اختارك
خساره اغليك واثني عزتي دونك
من اخر الجرح جيتك هاك تذكارك
اخر قصيده كتبتها الجرح لعيوونك
غرورك اللي رقابك فوق مقدارك
انا اطلب اللي يجي له يوم ويخونك
انا اول اللي حياك وهام بأشعارك
وانا اخر اللي يموتك لاجل يحيونك
مليت انا ارضى جفاك وبارد اعذارك
مليت امد النظر وتهينه غبونك
مصير وقتك يبور وتذبل ازهارك
ومصير كل الجروح الحمر ينسونك
واليوم يالجرح والله لاخذ بثارك
واسقيك من دم قلب خيب ظنونك
خله ترى اللي حصل من لعنة اقدارك
وارحل مع اللي يحبك وصل..يصونك
وماجيت انشد عن الهجران واخبارك
جيتك ابسألك بعد الجروح وشلونك

((بنت ابووها))


مبسم هيــــــا

قالوا كذا مبسم هيا .. قلت لا لا
============== بين البروق وبين مبسم هيا .. فرق
جريت أنا صوت الهوى .. باحتمالا
============== في وسط بستانٍ .. سقاه أربع فرق
طبّيت مع فرعٍ .. جديد الحبالا
============== وظهرت مع فرعٍ .. تناوح به الورق
روشن هيا .. له فرجتينٍ شمالا
============== وبابٍ على لقبله .. وبابٍ على الشرق
مبسم هيا .. له بالظلام اشتعالا
============== بين البروق .. وبين مبسم هيا فرق
برقٍ تلالا .. بأمر عز الجلالا
============== وأثره جبين صويحبي .. واحسبه برق
يا شبه صفرا .. طار عنها الجلالا
============== طويلة السمحوق .. تنزح عن الدرق
له ريق .. أحلى من حليب الجزالا
============== وأحلى من السكر .. إلى جاء من الشرق
حنيت إنا .. حنة هزيل الجمالا
============== ينقض ردي الخيل .. قد حسه الفرق
ويا قلته .. في عاليات الجبالا
============== ماها قراح .. مير من دونها غرق
ماعاد للصبيان .. فيها احتمالا
============== من كود مرقاها يديهم .. غدن طرق
قالوا تتوب من الهوى .. قلت لا لا
============== إلا إن تتوب .. ارماح علوى عن الزرق
قالوا تتوب من الهوى .. قلت لا لا
============== إلا إن يتوبون .. الحناشل عن السرق
قالوا تتوب من الهوى .. قلت لا لا
============== إلا إن تتوب الشمس .. عن مطلع الشرق

محسن الهزاني((شاعر الحريق))



ومرت سنه .. على فراقك
على صوتك .. واشواقك
غريب كيف االزمن يرحل
واحلام العمر .. تذبل ..
سنه مرت .. وانا أول ..
حبيبٍ يوقد الشمعه
لجرحه في يوم ميلاده
هلا .. بالحب .. واعياده
وكل عامٍ .. وجرحي بخير

مشيت دروبنا .. خطاوي قلوبنا
ومريت الوعد .. وعدنا العام
ماكان الوعد .. ولا الأيام .. هي الايام
وما ادري ليه هالشارع .. نسوه الناس
ومتى هالمقعد الخالي .. يجوه الناس
حبيبي .. ليه فـ غيابك .. يغيبوا الناس
حبيبي .. ايه والله حبيبي .. ايه والله
نساني العمر.. لو انساه
نساني الفرح .. لو انساه
احبه .. ما ظهر نجم .. ونبت عشب .. وسرى براق
أحبه .. لا زمن يشقي جروحي .. لا جفا .. وفراق
أنا هذا الهوى كله .. وقلبي آخر العشاق ..


الامير بدر بن عبد المحسن

جمرة غضى


جمرة غضى .. أضمها بكفي
أضمها حيل . .
أبي الدفا .. لو تحترق كفي
وأبي سفر لليل
بردان أنا تكفى .. أبي احترق بدفا
لعيونك التحنان .. فعيونك المنفى
جيتك من الإعصار .. جفني المطر .. والنار
جمرة غضى
والله الجفا برد .. وقل الوفا برد
والموعد المهجور ما ينبت الورد
ياحبي المغرور .. ياللي دفاك اشعور
رد القمر للنور .. واحلى العمر .. في وعد
بردان .. بردان أنا تكفى.. أبي احترق بدفا
يا أول الحب .. شفتك أنا مره
واهديت لك قلب
ورديت لي جمرة
ومن يومها كان الرحيل
وليل الشتا .. القاسي الطويل
وآه يا الحنين
لليل باب له حارسين
برد وسحاب


الامير بدر بن عبد المحسن

بنات الريح

من بنات الريح لي صفرن جفول ......... كنها ظبي الفلا بجفالها


منوة الخيال عساف الخيول ....... زينها في دقها وجلالها


زينها ماشفت مثله بالمثول ....................... الله اللي بالجمال اصخى لها


تستذير كحيلتي من كل زول ........................ مايصخرها سوا خيالها


اذكر الله كل ماقامت تجول ........................ واحمد الله خصني بحبالها


كنها تمشي على قرع الطبول .................... فتنة اللي خافقه يبرى لها


ضافي القصه على الطرف الخجول ............. تنكسر شمس الضحى بظلالها


وصفها وصف السحاب اللي يحول .......... كل عينن تستخيل خيالها


او كما طاري على الخاطر عجول ............. صاحبه حقيقته ماطالها


كل رجلن في حياته له ميول .............. والهوايه تمتلك رجالها

الامير خالد الفيصل


اتمنى ان القصـــائد عجبتكم
والسمووحه منكم لاني بخلت عليكم
بس الجايات اكثر ان شالله

تقبلوووو وودي

أخوكم القناص 20

يعطيك الف عافيه اخوي

على الكلامات الروعه

والف شكر لك على الطرح الرائع